Aldernative Berwerdung zum Tornerausflug noch Bambersch vom 1.-3.10.2021

Ich hab schun on vill Kaffeefahrde teilgenomme un inzwischen 17 Heizdecke deham gestapelt. Abber bei de Drolshage-Tuur hot´s nix gebbe. Des wern ich em abber noch stecke.

Ogefange hot´s nit schlecht. Die Fahrt im Regio nooch Frankfort verlief ohne Probleme. Abber in Frankfort musste mer erst emol unsern Platz im Eistrain suche. Die Zieech sin jo derart voll, dass de weit laafe musst, biste emol on deim Platz bist. Wenn de beim Übbersteie de Koffer ohne Beinbruch dein Platz gefunne host, hoste Glick gehabt. Naja, de Zuuch is dann pinktlich losgefahrn. Abber bis mer in Bambersch worn, musste mer zwaamol umsteie. Wenn des so einfach wär. Trepp enunner, Trepp enuff und des met dene alten Knabe un de Koffer.

Nooch übber zwaa Stund wor mer endlich in Bambersch. Kaan Bus in de Näh. Mer musste mit unserm Koffer bis ons Hotel laafe. Kennt er euch des vorstelle. Kaum wor mer dort, musste mer aach noch warte, bis de Zimmer frei worn. Ei ich glaabs jo nit. In unser Verzweiflung musste mer uff de Gass frühsticke. Schwetze konnte mer bei dem Autolärm nix. Mei Bronche worn völlich zu. Ich hätt om liebste mein Hausarzt uffgesucht. Abber der wor leider nit debei. Dennoch hab ich uff em Zimmer  erst emol Atemübunge mache müsse, damit ich widder jappse konnt. Kaum wor die Luft drin, musste wer se widder beim Stadtspaziergang erauslosse. Ich kann euch saache, des wor aan Stress. Des Bambersch wor voller Leut. Su e Gewühl hab ich noch nit uff de Zeil erlebt. Die Luft wor  zum Schneide un kaaner hat es Mask uff. Ich hab schun dreimol niese müsse. Wenn des kei Corona werd. 

Damit mer unser Plätz im Sternla aach kriee, musste mer im Schweinsgalopp dohie rase. Anstatt gepolsterte Bänk, gob´s nur Hartholzplätz. Mein A… hot ganz schee weh getan. Un dann musste mer was esse. E Zeuch, ich kann´s euch saache, es wor e Zumutung. Mein Kürbissüppche wor noch Gold geche das anner Zeuch. Des positivste om ganze Obend war, dass de Kaise de Zech übernomme hot. Dofür danke ich ihm noch emol ganz herzlich.

Om nächste Dach word gruß e Stadtrundfahrt oogekündigt. Ich hat extra mei Salontreter aagezoche. Was glaabste, was passiert ist: En aale Kerl mit e poor Bildcher vom aale Bambersch hot uns ze Fuß durch Bambersch geschleppt un uns schleimisch erklärt, warum kaan Bus durch die Altstadt fohrn derf. So sin mer fast 3 Stunn übber des Koppstaapflaster marschiert. Mei Hühneraache habbe juchee geschriee.

Noch dem Reifall sollte mer aach noch mit em Schiffchebootche fohrn. Stunnelang hunn mer in de glühend Hitz gestanne, nur mer als Erste uff dem Schiffche sein musste. 80 Minute uff dem Kahn, davon 30 Minute in de  Schleus. Nix gob´s ze seh. Was e Enttäuschung.

Mer sin dann noch e bissje dorch die Stadt un dann ins Schreiner´s. Widder dorchs Gewühl. Noch em esse wollte mer bezahle. Pfeifedeckel! Mer dorfte nit. Drs wor alles im Wautcher enthalle. Uff em Hamwech sin mer in die Näh von unserm Hotel in en Biergardde. Die Speisekart wor nit su groß, so dass mer uns uff de Zwibbelkuche gesterzt habbe. Zwibbel worn massich druff, de Kuche musste mer drunner suche. Des Rauchbier fing dann langsam o ze schmecke. Un schun hot sich widder aaner uffgedrängt, der bezahle wollt un es aach gemacht hot. Mer danke noch emol ganz herzlich unserm Dietmar. Noochdem uns dann kalt gewonn is, hun mer uns haam gemacht, damit mer om nächst Daach nit de Zuuch verbasse.

Wie immer worn die Aale zuerst om Frühstücksbuffet, damit se nur nit warte müsse. Su sinnse halt. Noch em Frühstück schun widder dorch die Stadt. Was wollte mer aach anners mache. De Zuuch ging erst um halb zwaa. Kaum worn mer drauße hatte se schun widder Hunger. Moins wor noch nit vill luus. Kaaner wusste wohie un de Gerhard wollt aach noch Weisswörscht. Noch langem Suche, hun mer die im Cafe Graupner gefunne. Mer kanns nit glaabe, alle 7, de Kaiserwor schun met em Auto haamgefahrn, habbe Weisswörscht mit Weissbier bestellt. Des hot uns übber die nächste Stunde geholfe.

De Regio wor pünktlich un de Eistrain in Würzburch aach. Donooch words allerdings prenzlich. Zwaamol is er uff offener Streck stehgeblibbe und achnoch Richtung Fulda gefahrn. Trotz dem Umwech is e pünktlich in Frankfort ookomme. Abber dann: Die S-Bahn is nit gefahrn, aach kaan Regio. Nernhause wor nit mer uff de Landkart. De Helmut wor völlig verzweifelt, hot alles unnernomme, damit mer in dem Lebe noch haamkomme. Informiert worn is widder kaaner. Dann hammer uns Stück für Stück zuerscht  nooch Höchst, un dann nooch villem frooche met em Bus noch Hofem geschliche. Obwohl do Endstation sei sollt, hot e uns dann doch nooch Nernhause gefahrn, abber weit ausgeholt übber die Autobahn. Er wor offenbar nit aus unserer Geeschend. Des wor e Uffreechung, kannste glaabe!

Nochemol su e Tour mit em Drolshage mach ich nit mehr mit.

Alles Guude wünscht euch de Ruudi!